ආදරයේ ආරාමය.

භූමිය මත සිනාසෙන, හරිතවන්,

කොතැනද වෑහෙන්නේ දීප්තිමත් ඇළ දොළ,

කොතැනද නිසසලව මන්ද මාරුත කෙළින්නේ,

ප්‍රසන්න සුගන්ධයෙ ආශ්වාසයෙන්,--

ගොඩැල්ල මත, මලින් පිළි පලදිමින්,

නැගි සිටින්නේය ආදරයේ ළකල් ආරාමය,

ඉසුරෙන්, රනින් දිදුළන්නේ නැත;

එය සරළය, එය අලංකාරයෙන් තොරය;

ඔදාත කිරිගරුඬෙන් නිර්මිත

ආදරයේ දෙව්දුවගේ බුහුමනට.

ඒ තුල පුදසුන විචිත්‍රය

ලියවැල අලංකෘතය සෙව්වන්දියෙන්:

එය තුල සුගන්ධ දූමයයි,--

හා සුදු පරවියන් ඒ තුල සිටී;

හාදුදෙයි, වැළඳගනියි පියාපත් වලින් --

අවට ඉගිලෙන්නේය කුඩා අනංගයන්;‍

පියස්ස මතට හමන්නේය පිහාටු වලින් ,

නදදුනි දෑත්පොඩි මත ධනු,

හා ලාලිත්‍ය ඔවුන් සමගින් ඉගිලෙන්නේය.

කුමක්ද පුදසුන මත එතැන?..

නුඹගේ රූපය, සුන්දරය මගේ කාතින්කා!!

මිහායිල් ලියොන්තේවිච් මග්නීත්ස්කි.

රුසියන් බසින් සිංහල බසට,

ෆීලික්ස් ප්‍රනාන්දු.